કોઇ સરનામું શોધીને લાવો,કે પડછાયા ભૂલા પડ્યા!
એને આંગળીએ ઝાલી લઇ જાઓ,કે પડછાયા ભૂલા પડ્યા!
પીળચટ્ટી આવળને છાંયે બાંધેલ
મારા બચપણની કટ્ટી છોડાવો;
રોઇ રોઇ થાકેલી સહિયરની ચોરેલી
સોનાની બુટ્ટી ઘડાવો.
એને સગપણની કેડી બતાવો,કે પડછાયા ભૂલા પડ્યા!
કોઇ સરનામું શોધીને લાવો,કે પડછાયા ભૂલા પડ્યા!
આંધળા તે પગરવની પૂંઠે આવીને
મારા સપનાની ડેલી ખખડાવી;
અંધારી રાત્યુંના ઓથારે બેસીને
અટકળની અબળા અભડાવી.
એને સૂરજની ઝાઁખી કરાવો,કે પડછાયા ભૂલા પડ્યા !
કોઇ સરનામું શોધીને લાવો,કે પડછાયા ભૂલા પડ્યા !
-'જિત' ઠાડચકર
ટિપ્પણીઓ નથી:
ટિપ્પણી પોસ્ટ કરો