આવું છું હિંમત કરીને આજ કે આ વાતનો છેડો મળે;
જોઈ લેવા છે બધાં હથિયાર કે આઘાતનો છેડો મળે.
હું નથી અંધારનો પર્યાય કે આવી સજા હું ભોગવુ;
બારણા- બારી ફરી ખુલ્લાં કરો કે રાતનો છેડો મળે;
આંસુઓના ખારથી આખાય ચહેરા પર લૂણો લાગી ગયો;
રોઈ લેવા દો હવે ચોધાર, અશ્રુપાતનો છેડો મળે;
હું અભિપ્રાયો ઉપરછલ્લાં તને આપું તો એથી શું વળ્યું;
માર ડૂબકી તું જ પોતાની ભીતર તો જાતનો છેડો મળે;
કોઈ મારા શ્વાસનો દરિયો ઉલેછી નાંખવા મથતું રહે;
હું જ છોડું શ્વાસની મરજાદ, ચંચુપાતનો છેડો મળે;
-'જિત' ઠાડચકર