સાવ સૂક્કા અવસરની પાળે ઉગેલ
એક ઘટનાની ડાળે અમે માળો કર્યો.
શમણા બનીને રોજ આવ્યા કરે
કોઇ મુલકના પંખી અજાણ્યાં;
જન્મારો આખો જોને સાથે ગાળ્યો,
બસ માણ્યાં, કદી ના પિછાણ્યાં.
તણખાને ટેકે અમે બેસી રહ્યા, ને
પેલા પાંદડાએ ખોટો હોબાળો કર્યો !
સાવ સૂક્કા અવસરની પાળે ઉગેલ
એક ઘટનાની ડાળે અમે માળો કર્યો.
જગની વિશાળતાયે વામણી પડે,
એક માળાના ગોળ ગોળ ખાડે;
અવસર સૂક્કો ને તોય લીલા સંબંધે
રહ્યા તું ને હું થડિયાની આડે.
કેમે કરીને મૌન ભેગું કર્યું ને,
પેલા સ્મરણોનાં ટહુકાએ ચાળો કર્યો !
સાવ સૂક્કા અવસરની પાળે ઉગેલ
એક ઘટનાની ડાળે અમે માળો કર્યો.
-'જિત' ઠાડચકર
